लगभग अनिदो गयो
आजको रात
जब अनिदो बित्छ रात
कहाँबाट आवोस् सपना
जब बाटो नै बन्द हुन्छ सपनाको
कहाँबाट साटियोस् मनको भावना ?

घाम जस्तै हो मन
जो सपना बनेर झुल्किन्छ
जसरी दिने गर्दछ घामले
राप र ताप
त्यसै गरी दिने गर्दछ
मनलाई सकुन
तिमीसंग हुने स्वप्निल मिलनले पनि ।

मैले देख्ने गरेका सपनाहरू
मात्र भावना होइनन्
मेरा भावनाहरू मेरा मनका
उत्कण्ठ इच्छाहरू समेत हुन्
जो चहार्ने गर्छन्
चङ्गा बनेर आकाशको निकै माथि
बादल संग रमाउँदै
मेरो त मात्र चाहना हो
मेरा यी स्वप्निल चङ्गारुपि भावनाको धागो
तिम्रा मनका बलिया हातहरूमा समाइएका हुन्
ताकि म कतै चुडिएर हराई नजाउँ ।

म विश्वस्त छु
चुडिने छैन चङ्गाको यो धागो
हराउने छैनन् सपनाहरू
आजको रात अनिदो भइयो त के भयो
भोलि फेरि आउने छ चकमन्न रात
र देखिने छ सपना
जहाँ मात्र तिमी हुनेछौं
र म हुनेछु
तिम्रो अगलबगल ।
२०७७ साउन २४
बुटवल ।