दाङ – दाङकाे बंगलाचुली गाउँपालिकामा लगातारकाे वर्षापछि आएकाे बाढी र पहिराेमा परेर एक जनाको ज्यान गएको छ । यस्तै दुई जना बेपत्ता भएका छन् ।

अर्जुन खाेलाले बगाउँदा बंगलाचुली गाउँपालिका ६ दारेगौडाका ५७ वर्षीय डम्बरबहादुर विककाे ज्यान गएको हाे । खाेलाले बगाउँदा बंगलाचुली ५ जहरेकी पार्वती नेपाली बेपत्ता हुनुभएकाे छ । यस्तै पहिराेमा परेर बंगलाचुली ४ गहतेराकी हिरा नेपाली बेपत्ता हुनुभएकाे बंगलाचुली गाउपालिकाका प्रेस संयोजक जीवन नेपालीले जानकारी दिनुभयो । याे घटना दुई दिनअघिकाे भएकाे भए पनि विकट पहाडी बस्तीमा गाउँपालिकाको टोली लगत सङ्कलनका क्रममा आज साेमवार पुग्दा घटना पत्ता लागेको प्रेस संयोजक नेपालीले बताउनुभयो ।

वर्षाका कारण ठाउँ–ठाउँमा पहिराे जाँदा बंगलाचुलीकाे आठ वटै वडामा रहेका दर्जनौँ सडकमा अवराेध पुगेकाे छ । यस्तै गाउँपालिकामा रहेका दर्जनौँ विद्यालयका भवनमा क्षति पुगेको छ । वर्षाले पानीका मुहान पुरिँदा स्थानीयलाई पानी पिउन समस्या भएको, दर्जनौँ बस्ती पहिरोको उच्च जोखिममा रहेका गाउँपालिकाले जनाएको छ । बाढी र पहिराेका कारण घर भत्किएपछि स्थानीयहरू आफन्तकाेमा र सार्वजनिक ठाउँमा आश्रय लिएर बसिरहेका छन् ।

विपदकाे समयमा स्थानीय सरकारको अनुभूति हुने गरी आफूहरू पीडितकाे अवस्थाको विवरण सङ्कलन गर्ने काममा दिन/रात खटिरहेको बंगलाचुलीका अध्यक्ष तुल्सीराम पुनले बताउनुभयो । गाउँपालिकाका उपाध्यक्ष भक्तबहादुर जिसीले पीडितलाई उद्धार गरेर सुरक्षित ठाउँमा लैजानु पालिकाकाे पहिलाे प्राथमिकता भएकाे भन्दै त्यहीअनुसार काम गरिरहेकाे बताउनुभयाे ।