बुटवल – पश्चिमाञ्चल पेट्रोलियम डिलर्स एशोसिएशन रुपन्देहीले संस्थाको २८ औं स्थापना दिवसको अवसरमा बुटवल ७ स्थित नन्दीनी गौशालालाई गौ आहार प्रदान गरेको छ ।

लुम्बिनी अञ्चलका ६ र गण्डकी प्रदेशका दुई गरी ८ जिल्लामा पेट्रोलियम पदार्थको विक्री बितरण र आपुर्तीको ब्यवस्थापन गर्दै आईरहेको एशोसिएसनले सामाजिक उत्तरदायित्व अन्तर्गत स्थापना दिवसको अवसरमा गौशालामा रहेका गाई गोरुका लागि आहार प्रदान गरेको हो ।

गौशालामा आज (सोमबार) बिहान आयोजित गौ आहार प्रदान कार्यक्रममा बोल्दै बुटवल उपमहानगरपालिकाका प्रमुख खेलराज पाण्डेले पशु चौपायका कारण बढिरहेको सवारी दुर्घटना र किसानका वाली नालीमा पशु चौपायाले पुर्याएको क्षतीलाई मध्येनजर गरी गौशालाको परिकल्पना गरेर सडकका छाडा चौपायाको ब्यवस्थापन गरिएको बताउनु भयो ।

संघीय सरकारले ध्यान नदिएको र विद्यमान ऐन कानून र नीतिमा परिमार्जज नभएका कारण स्थानीय सरकारले अगाडी सारेका कतिपय योजना कार्यान्वयनमा समस्या परेको भन्दै उहांले भन्नुभयो–“गौशाला भएको क्षेत्रलाई धार्मिक वनको रुपमा विकास गर्न सकिए गौशालामा राखिएका गाई गोरुको ब्यवस्थापनमा कुनै समस्या हुने थिएन ।”

पश्चिमाञ्चल पेट्रोलियम डिलर्स एशोसिएशनका अध्यक्ष हिमाल गैरेले एशोसिएसनले ब्यवसायीको हकहित र ब्यवसायको प्रवद्र्धन संगै सामाजिक क्षेत्रमा पनि उल्लेखनिय योगदान गरेको बताउनुभयो । उहांले एशोसिएसनले रु. १० लाखको अक्षयकोष स्थापना गरी यसबाट प्राप्त हुने ब्याजबाट यस क्षेत्रमा रहेका अपाङ्ग आश्रम, दिवा सेवा आश्रमलगायतका संस्थाहरुलाई सहयोग गर्दै आईरहेको र स्थापना दिवसको अवसरमा गौशालामा रहेका गाई वस्तुका लागि गौ आहार प्रदान गरिएको बताउनु भयो ।

सो अवसरमा गौ आहारका लागि एशोसिएसनका तर्फबाट रु. २५ हजार बराबरको १५ बोरा (६ सयकिलो) तोरीको पिना नगरप्रमुख पाण्डे मार्फत गौशालालाई प्रदान गरिएको कार्यक्रम संयोजक भरत जङ्ग कुंवरले जानकारी गराउनु भयो ।

कार्यक्रममा एशोसिएसनका केन्द्रीय सदस्य राजु न्यौपाने, दिपक भट्टराई, महासचिव हरिराम कसौधन, सचिव डांसिराम अधिकारी, कार्यसमितिका पदाधिकारी तथा सदस्यहरुले यस्ता कार्यलाई आगामी दिनमा पनि निरन्तरता दिने प्रतिवद्धता जनाउनु भयो ।