जलेवी जीन्दगी !

एउटा ममताको भांडोबाट

एक टुक्रा टालोमा बेरीएर

निचोरिदैं शुरु भएको ऊ

तातो कराहीमा छट्पटाउदैं, रन्थनिंदै ,

उकासिंदै , तैरिंदै ,

अनेक फूलबुट्टामा सजिएर

सजिएको छ।

आहा १

मुखै रसाउने रसिलो जलेवी नखाने कमै होलान्।

यस्तो,उस्तो,त्यस्तो , कस्तो अनेक

बहानाका चाहनाका बुट्टा भर्दै

चौरस्तामा सबैको मन लोभ्याएको छ ।

जुन दिन,

जुन दिन ममताको भांडोबाट

टालोमा पदार्पण भयो ,

उसै दिन देखी,

उसले कसैको प्यास मेटाएको छ ,

कसैको प्यास बढाएको छ,

कसैको रहर मेटाएको

कसैको स्वाद मेटाएको छ ,

रसिलो, गुलियो जलेवी

जब ,

जब खाएर , रहर , प्यास मेट्छन्

हिस्सी परेको जलेवीलाई दोषारोपण शुरु भयो ।

सुगर गरायो,मोटो गरायो,पेटै दुखायो

सायद,

सायद जीवन पनि जलेवी नै हो

भन्ने लाग्छ।

गर्भासयबाट एउटा टालोमा

पदार्पण गरेदेखि,

हो ,

उसै दिन देखि

जानी नजानी , चाहि नचाहि, सकि नसकि

कसैको रहर बनेको छ जीन्दगी

कसैको प्यास बनेको छ जीन्दगी

कसैको स्वाद बनेको छ त कसैको आदत बनेको छ।

खिस्स हाँस्यो,

जीन्दगीको तातो कराहीमा पिल्सिंदै

उचालिंदै , पछारिंदै , डुब्दै, तैरिंदै

कसैको रसिलो चास्नीमा डुबेको छ जीन्दगी।

अनेक हण्डर, ठक्कर र चक्करमा

थोरै साहस बोकेर,

भोलीको अमरत्वका लागि

जीवन बाँचिरहेको छ।