काठमाडौं- जल तथा मौसम विज्ञान विभागले आगामी तीन दिन मधेश र लुम्बिनी प्रदेशका तराई भू–भागका थोरै स्थानमा मध्यम स्तरको तातो हावाको लहर (हिट वेभ) चल्ने सम्भावना रहेको जनाएको छ।

विभागका अनुसार सोही अवधिमा कोशी, बागमती, गण्डकी तथा सुदूरपश्चिम प्रदेशका तराई भू–भागका केही स्थानमा तातो दिन (हट डे) को अवस्था रहने सम्भावना छ।

ती क्षेत्रका केही स्थानमा अधिकतम तापक्रम ३८ डिग्री सेल्सियस वा सोभन्दा बढी पुग्न सक्ने अनुमान गरिएको छ।

विभागले अत्यधिक गर्मी तथा तातो हावाको लहरका कारण मानव स्वास्थ्यमा सामान्यदेखि गम्भीरसम्म असर पर्न सक्ने भएकाले आवश्यक सतर्कता अपनाउन आग्रह गरेको छ।