बुटवल – रुपन्देहीको बुटवल स्थित लुम्बिनी प्रादेशिक अस्पतालमा आज पनि एक जना कोरोना संक्रमित आईसीयू बेड नपाएर ज्यान गुमाएका छन् । संक्रमितले २४ घण्टादेखि अस्पतालको इमर्जेन्सीमा बसेर बेडको प्रतीक्षा गरेपनि खाली नभएपछि आज बिहान मृत्यु भएको अस्पतालले जनाएको छ ।

बुटवल ११ का ८३ वर्षीय पुरुषलाई स्वास्थ्यमा समस्या देखिएपछि बैशाख १५ गते अस्पताल पुर्‍याइएको थियो । कोरोनाको लक्षण देखिएपछि १५ गते स्वाव संकलन गरिएकोमा १६ गते उनको पीसीआर रिपोर्ट पोजेटिभ आएको थियो । पोजेटिभ आएसँग बेडको प्रतीक्षामा इमर्जेन्सीमा अक्सिजनको सहायतामा राखिएकामा उनको आज बिहान साढे ९ बजे मृत्यु भएको अस्पतालका प्रवक्ता डा। बिष्णु गौतमले जानकारी दिए ।

उनका अनुसार, लुम्बिनी प्रादेशिक अस्पतालमा कोरोना संक्रमितको अत्यधिक भीड भएपछि हाल फिबर क्लिनिकसहित इमर्जेन्सीमा समेत कोरोना संक्रमितलाई राखेर उपचार चलिरहेको छ । कोरोना विशेष अस्पताल र भिम अस्पतालका सबै बेड भरिएपछि लुम्बिनीले फिबर क्लिनिक र इमर्जेन्सीलाई समेत कोरोना उपचारमा प्रयोग गरेको हो । अघिल्लो हप्ता पनि देवदह नगरपालिकाका वडाध्यक्षका श्रीमतीको आईसीयू नपाएर फिबर क्लिनिकमा ज्यान गएको थियो ।