बुटवल– लुम्बिनी प्रदेशसभामा सरकारका तर्फबाट जवाफ दिएपछि विपक्षी एमालेले संसदमा बजेट पेश गर्न दिएको छ।

स्वास्थ्य राज्यमन्त्री विमला वलीको घटनामा सरकारको जवाफ माग गर्दै एमालेले सदनमा अवरोध कायम गरेको थियो। अपरान्ह ४ बजे शुरु भएको बैठकमा एमालेले अवरोध गरेपछि २५ मिनेटका लागि सदन स्थगित गरिएको थियो। तर, स्थगित भएको डेढ घन्टापछि मात्रै सदन शुरु भएको हो।

सदनमा सरकारका प्रवक्ता आन्तरिक मामिला तथा सञ्चारमन्त्री तिलकराम शर्माले सरकारले राज्यमन्त्री विमला कुमारी खत्री वलीले महिलामाथि गरेको व्यवहारका सन्दर्भमा सरकारको ध्यानाकर्षण भएको बताउँदै छानविन समिति गठन गरेको बताए । उनले सरकारले अभिभावकीय भूमिका निर्वाह गर्न तयार रहेको प्रतिबद्धता जनाए ।

विपक्षी एमाले संसदीय दलले भने मुख्यमन्त्रीबाटै जवाफ माग गरेको थियो । त्यहि बिषयमा लामो छलफलपछि सवैधानिक प्रावधान अनुसार बजेट ल्याउनुपर्ने भएकाले सरकारका तर्फबाट प्रवक्ताले जवाफ दिएपछि बजेट प्रस्तुत गर्न विपक्षी एमालेले सहमती जनाएको हो। आर्थिक बर्ष ०७९–८० को बजेट प्रदेशसभामा आर्थिक मामिला तथा सहकारी मन्त्री कृष्णध्वज खड्काले प्रस्तुत गरेका छन्।