तिलोत्तमा, तिलोत्तमा नगरपालिकाले अघि सारेको हरियाली प्रवर्धन एवम् नियमित सरसफाइ अभियान अन्तर्गत आज तिलोत्तमा वडा नं तीनमा वृक्षारोपण गरिएको छ ।

तिलोत्तमा नगरपालिका वडा नं तीन को शान्तिकुन्ज देखि सीताराइसमिल सम्मको मुख्य सडकको बीचमा रहेको डिभाइडरमा रहेको खाली स्थानमा बृक्षारोपण गरिएको हो ।

कार्यक्रममा तिलोत्तमा नगरपालिकाका नगर प्रमुख रामकृष्ण खांणले हरियाली सहितका सफा र चौडा सडकमा राखिएका बुद्धका मूर्तिसँगै तिलोत्तमा शान्त र सुन्दर देखिएको भन्दै‘तिलोत्तमालाई वातावरणमैत्री बनाउने चरणमा हामीले पनि अझै धेरै गर्नुपर्ने छ,’ उहाँ बताउनुहुन्छ,‘सफाइलाई कुनै दिन र उत्सवभन्दा पनि जीवन पद्धति बनाएपछि मात्र साँचो अर्थमा सहर सफा हुन्छ।’

तिलोत्तमा नगरपालिकामा सरसफाई र हरियाली प्रबर्द्धनमा स्थानीयको उत्तिकै साथ रहेको छ। जसका कारण मूल सडकसँगै भित्री सडक पनि सफा र सुन्दर देखिएका छन्।

वृहत वृक्षारोपण सप्ताह मनाउने क्रममा साउन १ गते देखि नगरका विभिन्न स्थानमा बृक्षारोपण गरिएको हो।

कार्यक्रममा तिलोत्तमा वडा नं तीनका वडाध्यक्ष कल्याण प्रसाद पौडेल, वडा नं २ का वडाध्यक्ष डिल बहादुर भट्टराई जनप्रतिनिधिहरु , आमासमूहका प्रतिनिधि टोल विकास संस्थाका अध्यक्ष एवं प्रतिनिधि स्थानीय वासिन्दा सहितको उपस्थितिमा वृक्षारोपण गरिएको थियो।

हडक डिभाइडरमा लगाएका बिरुवा मरेको र खाली भएको स्थानमा आज करिब पचास वटा बेगनबेलीका बिरुवा रोपिएको तिलोत्तमा वडा नं तीनका सचिव गोकुल गिरीले जानकारी दिनुभएको छ।

वृक्षारोपण कार्यक्रममा करिब एक सय जनाको सहभागिता रहेको थियो।