बुटवल – बुटवल उपमहानगरपालिका–१७ स्थित नमस्ते टोल विकास संस्थाले सरसफाइ कार्यक्रम सम्पन्न गरेको छ।

समितिले विभिन्न सामाजिक कार्यसँगै नियमित रूपमा सरसफाइसम्बन्धी कार्यक्रम सञ्चालन गर्दै आएको जनाएको छ। सोही क्रममा आज मोतीपुर खानेपानी तथा सरसफाइ उपभोक्ता संस्थाको सहयोगमा जनशक्ति नमुना माध्यमिक विद्यालयको प्राङ्गणमा सरसफाइ गरिएको हो।

कार्यक्रममा विद्यालय परिसरमा रहेका प्लास्टिकजन्य तथा अन्य अजैविक फोहोर संकलन गरी व्यवस्थापन गर्नुका साथै विद्यालय परिसरको सरसफाइ गरिएको थियो।

विद्यालयका निवर्तमान अध्यक्ष टंक न्यौपानेको संयोजकत्वमा भएको कार्यक्रममा बुटवल–१७ का जनप्रतिनिधि रामप्रसाद न्यौपानेलगायत स्थानीय युवा, सामाजिक अभियन्ता तथा विद्यालयसँग सम्बन्धित व्यक्तिहरूको सहभागिता रहेको जनाइएको छ।

विद्यालय तथा सार्वजनिक स्थललाई स्वच्छ र सफा राख्न विद्यार्थी तथा समुदायमा सकारात्मक सन्देश प्रवाह गर्ने उद्देश्यले कार्यक्रम आयोजना गरिएको नमस्ते टोल विकास संस्थाकी अध्यक्ष सुनिता रास्कोटीले बताउनुभयो।

सफा तथा स्वस्थ नगर निर्माणको प्रयासस्वरूप मोतीपुर खानेपानी तथा सरसफाइ उपभोक्ता संस्थाको अगुवाइमा बुटवल उपमहानगरपालिका–१७, १८ र १९ का ३५ वटा टोलमा नियमित सरसफाइका कार्यक्रम सञ्चालन भइरहेको जनाइएको छ।