कपिलवस्तु । गएराती एक नेताको हत्या भएपछि कपिलवस्तुको शुद्धोधनमा स्थिति अनियन्त्रित भएको छ । स्थानीयबीच भएको विवादका क्रममा गोली चलेको र त्यहीक्रममा प्रदेश सभा निर्वाचनमा स्वतन्त्र उम्मेदवार बनेका शुद्धोधन गाउँपालिका–४, मोतीभारी का २८ वर्षीय राजाबाबु भनिने दीपेन्द्रकुमार चौधरी हत्या भएको थियो ।

हत्याको आरोप लागेका अजित पाण्डेको प्रमिला पेट्रोल पम्पमा आगजनी गर्न जाने क्रममा प्रहरी र स्थानीयबीच झडप भएको छ। स्थानीयले पाण्डेको कम्पाइन र ट्याक्टरमा आगजनी गरेका छन् ।

स्थितिलाई नियन्त्रणमा लिन प्रहरीले अश्रुग्यास प्रहार गरेको छ । प्रहरीको लाठीचार्जबाट केही स्थानीय घाइते भएका छन् । मृतकका आफन्तले लुम्बिनी तौलिहवा सडक खण्ड अहिले बन्द गरेका छन ।

स्थानीयहरुबीच विवाद हुँदा राति करिब साढे १० बजे चौधरीमाथि गोली प्रहार भएको कपिलवस्तुका प्रहरी उपरिक्षक अच्युत पुडासैनीले बताए। हत्यामा संलग्नको खोजी भैरहेको प्रहरीले जनाएको छ। चौधरी प्रदेशसभा निर्वाचनमा कपिलवस्तु निर्वाचन क्षेत्र नं‍. १ (ख)मा स्वतन्त्र उम्मेदवार थिए।