ललितपुर : ललितपुर महानगरका तीन ठाउँमा ट्राफिक बत्ती जडान गरिएको छ। महानगरले यार्सा टेक्नोलोजी कम्पनीको सहयोगमा कुपण्डोलदेखि जावलाखेलसम्म तीन वटा ट्राफिक बत्ती राखेको हो।

कुपण्डोलको उकालोे, महानगरपालिकाको कार्यालयअगाडि र अल्का अस्पताल छेउमा ट्राफिक बत्ती जडान गरिएको महानगरले जनाएको छ।

महानगर प्रमुख चिरीबाबु महर्जनले ट्राफिक व्यवस्थापन समस्या अन्त्य गर्न महानगरले बत्तीको व्यवस्था गरेको बताए।

उनले भने, ‘यो कामलाई महानगरले निरन्तरता दिँदै जान्छ।’

दिनहुँ बढेको सवारी चाप व्यवस्थापनमा बत्तीले सहयोग गर्ने महानगरपालिकाका प्रवक्ता राजु महर्जनले बताए।

महानगरपालिकाले नेपाल विद्युत् प्राधिकरणसँगको सहकार्यमा पुल्चोकदेखि कुपण्डोलसम्म ‘स्मार्ट बत्ती’ समेत जडान गर्ने भएको छ।