वीरगञ्ज, चैत १७ : आइतबार साँझ आएको शक्तिशाली हावाहुरीले बारा र पर्साका विभिन्न भागमा घरहरू भत्काउँदा दर्जनौंको ज्यान गएको छ।

आइतबार मध्यराति पर्साका एसपी रेवती ढकालले दिएको जानकारीअनुसार मृतकको संख्या ३१ पुगिसकेको छ ।

त्यसमध्ये सबैभन्दा बढी बारामा २७ जना र एक जना पर्साका रहेका छन् । मृत्यु हुनेको संख्या अझै बढ्ने अनुमान गरिएको छ ।

मृत्यु हुनेमा बालबालिका र महिलाको संख्या धेरै छ।

तीमध्ये धेरैको ज्यान आफ्नै घरले किचेर भएको थियो । कच्का फुसका घर मात्रै नभई कतिपय पक्की घरहरू समेत लडेका छन् । हालैका दशकमा यति शक्तिशाली हावाहुरी तराईमा नआएको स्थानीय वासिन्दाहरू बताउँछन्।

बेड नपाएर भूइँमै पनि विरामीहरूलाई राखिएको छ । वीरगञ्जका स्थानीय एम्बुलेन्सहरूले नपुगेर सीमापारि रक्सौलबाट पनि थप एम्बुलेन्सहरू मगाइएको छ।

अहिलेसम्म दुई जनाको मात्रै नाम खुलेको पर्साका एसपी ढकालले बताए । पहिचान भएका मृतकमा वीरगञ्ज–१८ का सरोज राम र फेटा गाउँपालिकाकी रुनी देवी छन् ।

बाराको फेटा गाउँपालिकामा सबैभन्दा धेरै क्षति पुगेको छ । त्यहाँ धेरै घरहरू हावाहुरीले ढलेका छन् ।

घाइतेहरूको वीरगञ्जस्थित नेसनल मेडिकल कलेज, नारायणी उपक्षेत्रीय अस्पताल, वीरगञ्ज हेल्थ केयर र एडभान्स मेडिकेयरमा उपचार भइरहेको छ ।

घाइतेको उपचारका लागि तत्काललाई औषधिको अभाव नभए पनि केही ग्रुपका रगतको भने अभाव रहेको स्थानीय चिकित्सकहरूले बताएका छन् । उनीहरूले आपतकालीन रक्तदानका लागि आग्रह गरेका छन् ।