बुटवल । नेपाली सेनाको गोरखा-जितगढी एकीकरण पदयात्रा आजदेखि सुरु भएको छ ।पृथ्वीनारायण शाहले नेपाल एकीकरण गर्न हिँडेका पदमार्गको प्रचारका निम्ति विगतका वर्षमा जस्तै पदयात्रा सुरु भएको हो ।

पदमार्गमा पर्ने कोट, गढी, किल्लाहरुको संरक्षण तथा तिनको इतिहासबारे सर्वसाधारणलाई जानकारी गराउनु पदयात्राको उद्देश्य भएको भद्रदल गणका गणपति गौरवसिंह क्षेत्रीले जानकारी दिए । गोरखा दरबारबाट आज बिहान सखारै प्रारम्भ भएको पदयात्रा तनहुँको सतिघाट-भन्सार-भीमसेनगढी-बाङ्गेरह-सेपाबगैँचा-टुहुरेपसल-तनहुँसुर-धेनुङ देउराली-केलादीघाट हुँदै आगामी वैशाख ७ गते बुटवलको जितगढी पुगेर भव्य समारोहकासाथ समापन गरिने प्रचलन रहेको छ । विगतका वर्षमा जस्तै बुटवल उपमहानगरले विभिन्न कार्यक्रम गरि वैशाख ७ लाई विजय उत्सवका रुपमा मनाउने तयारी गरेको छ ।