काठमाडौं – नेपाल पत्रकार महासंघका उपाध्यक्ष विपुल पोखरेलले नेपाली मिडिया जगतलाई प्रधानमन्त्री केपी शर्मा ओलीले लगाउनुभएको आरोप मिथ्या भएको बताउनुभएको छ ।

प्रधानमन्त्री ओलीले मंगलबार देशवासीको नाममा सम्बोधन गर्ने क्रममा नेपाली मिडिया क्षेत्रबारे लगाएका आरोप कपोकल्पित भएको उपाध्यक्ष पोखरेलको टिप्पणी छ । कोरोनाविरुद्धको लडाईमा नेपाली मिडिया क्षेत्रको भूमिका प्रशंसनीय रहेको उल्लेख गर्दै उपाध्यक्ष पोखरेलले प्रधानमन्त्री ओलीले भने झैं मिडियाले सरकारविरुद्ध प्रचारको बेमौसमी बाजा नबजाएको दावी गर्नुभयो ।

बेथितिका विरुद्ध नेपाली मिडियाले सधैं कलम चलाएको स्मरण गर्दै उपाध्यक्ष पोखरेलले कोरोनाबारे अफवाह फैलन नदिने नेपाली मिडिया प्रतिबद्ध रहेको बताउनुभयो । प्रधानमन्त्रीको सम्बोधनमा मिडिया र पत्रकारलाई कठिन समयका लागि विशेष प्याकेज घोषणा गरिएपनि त्यसो हुन नसकेको भन्दै पोखरेलले मिडियाका कठिनाई सम्बोधन गर्न माग समेत गर्नुभएको छ ।