एजेन्सी- अमेरिकाका राष्ट्रपति डोनल्ड ट्रम्पले चीनको बाइटडान्स कम्पनीको टिकटक माइक्रोसफ्टलाई बेच्नका लागि ४५ दिनको समय दिएका छन् ।

ट्रम्पले केहीदिन अगाडि चिनियाँ एप टिकटकमाथि चिनियाँ नियन्त्रण रहेको आरोप लगाउँदै अमेरिकामा प्रतिबन्ध लगाउने बताएका थिए ।

तर, अमेरिकामा टिकटकले माइक्रोसफ्टको मातहतमा आएर सेवा दिने भनेपछि टिकटकलाई अमेरिकामा प्रतिबन्ध नलगाउने ट्रम्पले बताएका छन् ।

ट्रम्पले ४५ दिनभित्र अर्थात १५ सेप्टेम्बरसम्म सम्झौता गरिसक्न भनेर समयसीमा पनि तोकेका छन् ।

रोयटर्सका अनुसार हाल टिकटक र माइक्रोसफ्टबीच यही विषयमा छलफल भइरहेको छ ।

प्रयोगकर्ताको डेटा सेक्युरिटीको विषयमा विवाद झेल्दै आएको टिकटक अमेरिकी स्वामित्वमा जानसमेत राजी भएको छ ।

बाइटडान्सको बाहरी कमाई लगभग ७० प्रतिशत संयुक्त राज्यबाट आउने गर्छ ।