गुल्मी – गुल्मीको रेसुङ्गा विमानस्थलबाट आजदेखि हप्तामा चार पटक हवाई उडान सञ्चालन हुने भएका छन् । नेपाल वायुसेवा निगमले काठमाण्डाैबाट गुल्मीका लागि शनिवार उडान थप गरेको हो ।

यसअघि आइतवार, मङ्गलवार र बिहीवार उडान सञ्चालन हुँदै आएको थियो । निगमका आन्तरिक उडानतर्फ रहेका ट्विनअटर जहाजको मर्मत गरेसँगै उडान तालिका थप गरिएको रेसुङ्गाका स्टेशन प्रमुख सुमन थापाले जानकारी दिनुभयो ।

उहाँकाअनुसार निगमको उडान तालिका थप भएसँगै भाडादरसमेत वृद्धि भएको छ । नयाँ भाडादरअनुसार काठमाण्डाैबाट रेसुङ्गाका लागि १० हजार ९०२ र रेसुङ्गाबाट काठमाण्डाैका लागि १० हजार ७०२ रुपैयाँ निर्धारण गरिएको उहाँले जानकारी दिनुभयो ।

निगमले यसअघि काठमाण्डाैबाट रेसुङ्गाका लागि ७ हजार ५०० र गुल्मीबाट काठमाण्डाैका लागि ७ हजार ३०० रुपैयाँ भाडा लिन्थ्यो ।