काठमाडाैँ : आसन्न ग्रीष्मकालीन ओलम्पिकका लागि एशियाली छनोटमा नेपाली महिला फुटबल टोलीले आज घरेलु टोली म्यानमारविरुद्ध प्रतिस्पर्धा गर्दैछ ।

एशियाली छनोटको प्रारम्भिक चरणको समूह सीमा रहेको नेपालले आफ्नो पहिलो खेलमा बलियो मानिएको भारतलाई एक एक गोलको बराबरीमा रोकेको थियो ।

याङगोनस्थित थुवुना रंगशालामा हुने नेपाल र म्यानमारबीचको खेल नेपाली समय अनुसार साँझ सवा ५ बजेदेखि शुरु हुनेछ । आइतबारको खेलमा म्यानमारलाई पराजित गरे नेपाल दोस्रो चरणका लागि छनोट हुने छ भने पराजित भएमा अन्तिम खेलमा बंगलादेशमाथि जित्नै पर्ने दवाव हुनेछ ।

नेपाली टोलीका प्रशिक्षकमा हरि खड्काले नेपालले म्यानमारविरुद्ध खेल्दा दवाव भए पनि नजिता सन्तोषजनक निस्कनेमा विश्वस्त छन् ।

समूह सीमा म्यानमारले बंगलादेशमाथि ५–० को जित निकाल्दै स्पष्ट ३ अंक जोडि सकेको छ । यसैगरी दोस्रो स्थानमा रहेको नेपालले पहिलो खेलमा भारतसँग १–१ गोलको बराबरी खेल्दै १ अंक जोडेको छ ।

नेपालले अन्तिम खेलमा मंगलबार बंगलादेशसँग प्रतिस्पर्धा गर्नेछ । यही समूका भारत र बगलादेश पनि आइतबार नै भिड्नेछन् । ओलम्पिकका लागि एशियाली छनोटमा १८ देशको सहभागिता छ ।