काठमाडौँ । प्रधानमन्त्री केपी शर्मा ओलीलाई विवादित आइएनजीओ युनिफिकेसन एशिया प्यासिफिक समिटमा सुशासन कायम गरेको भन्दै पुरस्कृत गरिने भएको छ।

ओलीलाई आयोजक संस्था युनिभर्सल पिस फेडेरेसनले ‘गुड गभर्नेन्स अवार्ड’ प्रदान गर्ने भएको हो। प्रधानमन्त्रीका परराष्ट्र सल्लाहकार डा. राजन भट्टराईले प्रधानमन्त्री ओलीले अवार्ड पाइसकेपछि कार्यक्रमलाई छोटो सम्वोधन गर्ने कार्यक्रम समेत तय गरिएको पुष्टि गरे ।

यसअघि ओली पत्नीसहित आशिर्वाद लिने कार्यक्रममा सहभागी हुने भनिएपनि आलोचना भएपछि सो कार्यक्रममा ओली सहभागी नहुने भएका छन् ।

आयोजक संस्थाले प्रधानमन्त्री र उनकी पत्नी राधिकालाई निमन्त्रणा दिएको र उनीहरु सहभागी हुने कार्यक्रम तालिका समेत सार्वजनिक गरेको थियो।