कपिलवस्तु – कपिलवस्तुको कृष्णनगर नगरपालिका–१० विद्यानगरमा गोली प्रहारबाट एकजनाको हत्या भएको छ । अज्ञात समूहको गोली प्रहारबाट विद्यानगरका ४५ वर्षका पारस पुरीको उपचारका क्रममा मृत्यु भएको कपिलवस्तु प्रहरी प्रमुख प्रहरी उपरीक्षक अच्युतम् पुडासैनीले जानकारी दिए ।

आइतबार राति गोली प्रहारबाट घाइते भएका पुरीको उपचारका क्रममा मृत्यु भएको हो । पुरीको छातिमा गोली लागेको थियो ।

एउटा मोटरसाइकलमा आएका दुईजना अपरिचित व्यक्तिले पुरीलाई घरबाट बोलाएर घर नजिकै लगेर गोली प्रहार गरी भागेका थिए । घटनामा संलग्न भएको आशंकामा प्रहरीले तीनजनालाई पक्राउ गरेको छ ।