बुटवल
रुपन्देहीको तिलोत्तमा नगरपालिकाले युवाहरुलाई लक्षित गरि सहुलियत पुर्ण कर्जा दिने भएको छ ।उत्पादनसग जोडिन चाहने युवा शक्तिलाई लक्षित गरि उक्त कार्यक्रम ल्याएको नगरपालिकाले जनाएको छ।
नगरपालिकाले सहुलियतपुर्ण कर्जाको लागि प्रस्ताव आह्वान गरेको हो ।उक्त कर्जा लिन कुनैपनि धितो राख्नुपर्ने छैन ।
नगरपालिकाले तरकारी, फलफुल, च्याउ तथा जडिबुटी, पशुपालन मत्स्यपालन, नगदेबाली लगायतका क्षेत्रलाई कर्जा प्रबाहको प्राथमिकताको क्षेत्रको रूपमा तय गरेको छ ।
त्यसैगरी घरेलुु तथा कुटिर उद्योग र अन्य स्वरोजगारका क्षेत्रहरुलाई समेटिएको र यसबाट नगरभित्रका युवाहरु लाभान्वित हुने अपेक्षा गरिएको नगर प्रमुख बासुदेव घिमिरेले जानकारी दिनुभयो ।
कर्जा बापत चारलाख रुपैया प्राप्त गर्ने उधमीले व्याज रकम तीन महिनामा र सावाँ रकम पाँच बर्ष भित्र भुक्तानी गरिसक्नु पर्ने शर्त राखिएको छ ।
उक्त कर्जा बापत पुरुषले बार्षिक ४।५० प्रतिशत र महिलाले ३।५० प्रतिशत व्याज भुक्तानी गर्नुपर्ने शर्त राखिएको छ ।
साथै कर्जा प्राप्त गर्ने युवा १८ बर्षदेखी ५० बर्ष उमेरको हुनुपर्ने र कुनैपनी बैंक तथा वित्तीय संस्थाबाट कर्जा लिएको हुन नहुने नगरपालिकाले जनाएको छ ।
साथै महिला, दलित, पछाडी पारिएको वर्ग र समुदाय, वैदेशिक रोजगार बाट फर्किएकाहरुलाई प्राथमिकता दिने नगरपालिकाले जनाएको छ