काठमाडौं -संक्रमण भएको पुष्टि भएपछि आइसोलेशन नबसेकाहरूलाई ६ महिना जेल सजाय हुने बताइएको छ ।

पोजिटिभ आएका व्यक्ति आइसोलेशन नबसेको, बाहिर हिँडेको र अरूको सम्पर्कमा आएको भेटिएमा संक्रामक रोग ऐनअनुसार ६ महिनासम्म जेल सजाय हुने व्यवस्था रहेको स्वास्थ्य तथा जनसंख्या मन्त्रालयले जनाएको हो ।

मन्त्रालयको नियमित प्रेस ब्रिफिङका क्रममा प्रवक्ता डा. जागेश्वर गौतमले कोभिड-१९ पोजिटिभ आएका व्यक्तिहरू आइसोलेशनमा बसेको नपाइएकोले यस्तो निर्णय लिइएको बताएका छन् ।

गृह मन्त्रालय र जिल्ला प्रसासन कार्यलयमा समेत सूचना गरिसकेको हुँदा आइसोलेशनमा नबस्ने व्यक्तिहरूलाई पक्राउ गरी सजाय दिन अनुरोध गरेको डा. जागेश्वर गौतमले बताए ।

साथै, घरपरिवार तथा छिमेकीले समेत अनुगमन गरी पत्ता लगाइ खबर गर्न अनुरोध गरिएको छ ।

पीसीआर जाँचका लागि स्वाव संकलन गराएपछि रिपोर्ट नआएसम्म अनिवार्य रूपमा क्वारेन्टाइनमा बस्नुपर्ने स्वास्थ्य तथा जनसंख्या मन्त्रालयले आग्रह गरेको छ ।

डा. गौतमले यस अवधिमा पोजिटिभ आएमा संक्रमण अन्य व्यक्तिमा सर्न सक्ने हुँदा सावधानी अपनाउनु पर्ने बताए ।