बडादसैंको चौथो दिन आज (मंगलबार) नब दुर्गा भवानीको चौथो शक्तिको रुपमा रहेकी कुष्माण्डा भगवतीको पूजा गरेर मनाइँदैछ ।

अस्तित्व नभएको सृष्टिविहीन अवस्थामा यी देवीको मन्द मुस्कानद्धारा ब्रम्हाण्डको उत्पत्ति भएको हुनाले यिनलाई कुष्माण्डा भन्ने गरिएको धार्मिक विश्वास छ । कुभिन्डोलाई संस्कृतमा कुष्मान्ड भनिन्छ । बलिहरुमा यि देवीलाई कुभिन्डो प्रिय हुने धार्मिक ग्रन्थहरुमा उल्लेख गरिएको छ ।

देवीको भक्तिपूर्वक पूजाआजा गरेमा सबै रोग, दुख, कष्ट, दरिद्र जस्ता संकट निवारण भई सुख, समृद्धि, सम्पत्ति, आयु आरोग्य प्राप्त हुने जनविश्वास रहेको छ । देशभर रहेका विभिन्न मठमन्दिर र शक्तिपीठहरुमा बिहानैदेखि दर्शनार्थीहरूको भीड लाग्ने गरे पनि यस वर्ष कोरोना संक्रमणका कारण सबै मठ मन्दिर र शक्तिपीठहरु सुनसान छन् ।

विभिन्न मन्दिर तथा शक्तिपीठहरुमा आन्तरिक रुपमा पूजाआजा गर्ने गरिएको छ । यसैगरी राजधानी बाहिरका सप्तरीको छिन्नमस्ता, धरानको दन्तकाली, विराटनगरको काली मन्दिर, ताप्लेजुङको पाथीभरा, पोखराको विन्धवासिनी, डोटीको शैलेश्वरी, बाग्लुङको कालिका, गोरखाको गोरखकाली, मकवानपुरको चुरियामाई र भुटनदेवी लगायतका मन्दिर र शक्तिपीठहरूमा पूजाआजा भइरहेको बताइएको छ ।