काठमाण्डौ – प्रतिनिधि सभाअन्तर्गतको कृषि, सहकारी तथा प्राकृतिक श्रोत समितिको बैठक पाँच मिनेट बसेर सकिएको छ । आज बिहान साढे १० बजेका लागि बोलाएको बैठक गणपुरक सङ्ख्या नपुगेका कारण डेढ घण्टा पनि शुरु भएको थियो । तर बैठक शुरु भएको पाँच मिनेटमै स्थगीत भयो ।

बैठकमा समिति सभापति कुसुमदेवी थापाले समिति सदस्यहरुलाई भूमि सम्बन्धी सरकारले परिमार्जनहित प्रश्तुत गरेको प्रतिवेदन अध्ययन गर्न निर्देशन दिनुभएको छ । भूमिसम्बन्धी केही नेपाल ऐन संशोधन गर्न बनेको विधेयकको परिमार्जित प्रतिवेदनको मस्यौदामा सांसदहरुले बिरोध जनाएपछि भूमि मन्त्रालयले परिमार्जन गरेर अर्को मस्यौदा तयार पारी प्रस्तुत गरेको हो । जसमा सांसदहरुले अध्ययनको समय नपुगेकाले थप समय मागेपछि बैठक स्थगित गर्नुपरेको सभापती थापाले बताउनुभयो ।

समितिको बैठक स्थगित भएपछि सञ्चारकर्मीहरुसँग कुरा गर्दै नेपाली कांग्रेस सांसद प्रतिमा गौतमले संशोधनकर्ताहरुसँग थप छलफल गर्नुपर्ने भएकाले पनि बैठक स्थगित गर्नुपरेको बताउनुभयो ।

नेकपा एमाले सांसद सरस्वती सुब्बाले सङ्घीय निजामति विधेयकबारे हालै भएको घटनाबाट सचेत रहँदै गुणात्मक बनाउन आफूहरुले समय माग गरेको बताउनुभयो । भूमिसम्बन्धी विषय राजनीतिक मुद्दा पनि भएकाले राजनीतिक रूपमा पनि सहमति गर्ने हिसाबले समय थप गरिएको उहाँको भनाइ छ ।