बुटवल – नेपाली कांग्रेसले लुम्बिनी प्रदेशबाट वासुदेव घिमिरे ‘जङ्गली’  र चन्द्र बहादुर  केसीलाई राष्ट्रिय सभा सदस्यको उम्मेदवार बनाउने निर्णय गरेको छ ।  दाङका घिमिरेलाई अपाङ्ग क्लष्टरबाट उम्मेदवारका रूपमा अघि सारिएको हो, भने गुल्मीका  केसीलाई खुलाबाट उम्मेदवार बनाइने भएको हो ।

दाङको लमही नगरपालिका–१ निवासी  घिमिरे  कांग्रेसका पुराना र सङ्घर्षशील नेता  रहेको कांग्रेस कार्यकर्ताहरू बताउँछन् । घिमिरेको राजनीतिक यात्रा २०२९ सालमा नेविसंघबाट सुरु भएको हो । त्यसपछि उनी तरुण दलमा सक्रिय भए ।

२०४० सालमा नेपाली कांग्रेसको जिल्ला सदस्य बनेका  रहे । उनले तरुण दलको केन्द्रीय उपाध्यक्षको जिम्मेवारी समेत सम्हालेका  नेता हुन् । उनी कांग्रेसको क्षेत्रीय सभापतिसमेत भइसकेका छन् ।

केसी पनि कांग्रेसका पुराना  नेता हुन् ।  गुल्मी रेसुङ्गा नगरपालिका निवासी केसीले यस अघि  २०७४ मा  गुल्मी निर्वाचन क्षेत्र नं. २ बाट प्रतिनिधि सभाको  उम्मेदवार बनेका थिए । उनी  गुल्मीको  पूर्व जिविस सभापति  समेत भएर काम गरेका नेता हुन्  ।