काठमाडौं । राहदानी छपाइ तथा खरिद प्रक्रियामा भएको भनिएको अनियमितता सम्बन्धी अनुसन्धानका क्रममा अख्तियार दुरुपयोग अनुसन्धान आयोगले थप दुई जनालाई पक्राउ गरेको छ।

पक्राउ पर्नेहरूमा राहदानी छपाइसँग सम्बन्धित जर्मन कम्पनी मुहलबाउरका नेपाली प्रतिनिधि मनिन्द्रराज मल्ल र राहदानी विभागका तत्कालीन लेखा अधिकृत तुलसीप्रसाद आचार्य रहेका छन्।

उनीहरूमाथि राहदानी छपाइ तथा खरिद प्रक्रियामा आर्थिक अनियमितता भएको आरोपमा अनुसन्धान भइरहेको छ। अनुसन्धानका लागि दुवै जनाविरुद्ध अदालतबाट तीन दिनको म्याद थप गरिसकिएको अख्तियार स्रोतले जनाएको छ।

राहदानी खरिद प्रकरणमा अख्तियारले यसअघि पनि उच्च तहका अधिकारीहरूमाथि अनुसन्धान अघि बढाइसकेको छ। यस क्रममा राहदानी विभागका तत्कालीन महानिर्देशक तीर्थराज अर्याल र निर्देशक सुनीलकुमार केसीलाई पक्राउ गरी अनुसन्धान गरिएको थियो। उनीहरूविरुद्ध चार दिनको म्याद थप गरी अनुसन्धान अगाडि बढाइएको थियो।

बहुचर्चित राहदानी छपाइ प्रकरणमा थप व्यक्तिहरूको संलग्नता र खरिद प्रक्रियाका विभिन्न पक्षबारे अख्तियारले अनुसन्धान तीव्र बनाएको जनाएको छ।