गुल्मी -राष्ट्रिय परीक्षा बोर्डद्वारा सञ्चालित कक्षा १२ को वार्षिक परीक्षामा उत्कृष्ट नतिजा हासिल गरेका विद्यार्थीलाई सम्मान गर्दै भगवती माध्यमिक विद्यालय ले विशेष सम्मान कार्यक्रम आयोजना गरेको छ। कार्यक्रममा विद्यालयबाट कक्षा १२ उत्तीर्ण भएका विद्यार्थी तथा उनीहरूका अभिभावकलाई सम्मान गर्दै उत्कृष्ट नतिजा हासिल गर्ने विद्यार्थीलाई बधाई तथा शुभकामना व्यक्त गरिएको थियो।
यस वर्षको परीक्षामा विद्यालयकी छात्रा प्रतिमा न्यौपाने कालिगण्डकी गाउँपालिकाभर प्रथम हुन सफल भएकी छन् भने प्रकृति न्यौपाने गाउँपालिकास्तरमा द्वितीय भएकी छन्। दुवै विद्यार्थीको उत्कृष्ट सफलताले विद्यालयको शैक्षिक स्तरलाई थप उचाइमा पुर्‍याएको भन्दै विद्यालय परिवारले खुसी व्यक्त गरेको छ।
सम्मान कार्यक्रममा बोल्दै विद्यालयका वक्ताहरूले विद्यार्थीको सफलता केवल व्यक्तिगत उपलब्धि मात्र नभई विद्यालय, शिक्षक, अभिभावक र समग्र समुदायको साझा गौरव भएको बताए। निरन्तर अध्ययन, अनुशासन, शिक्षकको मार्गदर्शन र अभिभावकको सहयोगका कारण उत्कृष्ट नतिजा सम्भव भएको उनीहरूको भनाइ थियो। आगामी दिनमा पनि गुणस्तरीय शिक्षा प्रदान गर्दै अझ उत्कृष्ट नतिजा हासिल गर्ने प्रतिबद्धता विद्यालयले जनाएको छ।
कार्यक्रम शिक्षक अभिभावक संघका अध्यक्ष भीष्मराज न्यौपानेको अध्यक्षतामा सम्पन्न भएको थियो। कार्यक्रममा विद्यालय व्यवस्थापन समितिका सदस्य दीपक न्यौपाने र कृष्ण न्यौपाने, शिक्षक प्रतिनिधि सीता भट्टराई लगायतको आतिथ्यता रहेको थियो। सहायक प्रधानाध्यापक मुक्ति काफ्लेले स्वागत मन्तव्य राखेका थिए भने कार्यक्रमको सञ्चालन शिक्षक राधाकृष्ण न्यौपानेले गरेका थिए।
विद्यालयका अनुसार यस वर्ष कक्षा १२ को परीक्षामा सहभागी विद्यार्थीमध्ये ८० प्रतिशत विद्यार्थी उत्तीर्ण भएका छन्। विद्यालयले यस नतिजालाई सन्तोषजनक उपलब्धिका रूपमा लिँदै आगामी शैक्षिक सत्रमा अझ प्रभावकारी शिक्षण, सिकाइ र शैक्षिक गतिविधिमार्फत उत्कृष्ट नतिजा हासिल गर्ने लक्ष्य लिएको जनाएको छ।
कार्यक्रममा सम्मानित विद्यार्थीलाई सम्मानपत्र तथा शुभकामना प्रदान गरिएको थियो। साथै, विद्यार्थीलाई आगामी उच्च शिक्षा र भविष्यको शैक्षिक तथा व्यावसायिक यात्रामा निरन्तर सफलताको शुभकामना व्यक्त गर्दै विद्यालयले मेहनत, लगनशीलता र सकारात्मक सोचलाई निरन्तरता दिन आग्रह गरेको थियो।