पर्वत :पाकेको धान मुसाले खाइदिएको पर्वतको कुश्मा नगरपालिका–११ शिल्मीका किसानहरुले जिल्ला प्रशासन कार्यालयमा उजुरी दिएको केही समय बित्न नपाउँदै कुश्मा नगरपालिका–९ कटुवाचौपारीका किसानले पनि मुसाले धान नोक्सान पारेपछि राहात दिन माग गरेका छन्।

स्थानीय १६१ जना किसानले जिल्ला प्रशासन कार्यालय, कृषि ज्ञान केन्द्र र कुश्मा नगरपालिकामा राहातका लागि निबेदन पेश गरेको वडाध्यक्ष कृष्णप्रसाद लामिछानेले बताए।

आधा उत्पादन मुसाले खेतमै नष्ट गरेपछि राहातको माग गरेको लामिछानेको भनाइ छ। उनका अनुसार मुसाले एउटै घरको तीनदेखि १५ मुरीसम्म धान नष्ट गरेको छ। मुसारका कारण चरम मारमा परेको भन्दै स्थानीयको निवेदन दिएपछि जनप्रतिनिधि र कृषि प्राविधिकहरु खेतमा नै पुगेर अनुगमन गरेका छन्।

अनुगमनपछि उनीहरुले क्षतिको मूल्यांकन गरी किसानको खुद उत्पादन र नोक्सानको विवरण एकत्रित गरी वडा कार्यालयले राहातका लागि सिफारिस गरेको छ।

किसानहरुको माग सम्बन्धित निकायमा पठाइसकिएको प्रमुख जिल्ला अधिकारी गुरुदत्त ढकालले जानकारी दिए। क्षतिपूर्तिको व्यवस्था कसरी दिन सकिन्छ भन्ने आवश्यक समन्वय गरिरहेको प्रजिअ ढकालले बताए।