काठमाण्डौ – अमेरिकाको न्युर्योकमा कोरोना भाइरस (कोभिड १९) को सङ्क्रमणका कारण एकैदिन ६ सय ३९ जनाको ज्यान गएको छ । योसँगै न्युर्योकमा मात्रै कोरोना सङ्क्रमणका कारण ज्यान गुमाउनेको सङ्ख्या तीन हजार पाँच सय ६५ पुगेको बीबीसीले जनाएको छ ।

न्युयोर्क राज्यमा मात्रै सङ्क्रमितको सङ्ख्या एक लाख १३ हजार सात सयभन्दा धेरै छ । अमेरिकामा कोरोना भाइरसका कारण ज्यान गुमाउनेको सङ्ख्या आठ हजार चार सय ५२ पुगेको छ । यस्तै सङ्क्रमितको सङ्ख्या तीन लाख ११ हजारभन्दा बढी छ । अमेरिकाभरि शनिबार मात्रै एक हजारभन्दा धेरैको ज्यान गएकोमा आधा सङ्ख्या न्युयोर्कको रहेको खबरमा उल्लेख छ ।

न्युर्योकका गभर्नर एण्ड्रयु कुओमोले अबको चारदेखि १४ दिनमा राज्यमा कोरोना भाइरस सङ्क्रमणको प्रभाव अहिलेसम्मकै उच्च वा खराब स्तरमा देखिने चेतावनी दिएका छन् ।

यसैबीच विश्वका दुई सय ६ देश र दुई अन्तर्राष्ट्रिय पानी जहाजमा फैलिएको कोरोनाका कारण १२ लाख एक हजार ९ सय ३३ जनामा सङ्क्रमण पुष्टि भएको वल्डोमिटरले जनाएको छ । जसमध्ये दुई लाख ४६ हजार ६ सय ३४ जना उपचारपछि निको भएका छन् ।

त्यस्तै आठ लाख ९० हजार पाँच सय ८३ जनाको उपचार भइरहेको छ । ६४ हजार सात सय १६ जनाको ज्यान गएको छ ।