कपिलवस्तु । प्रदेश सभा निर्वाचनमा स्वतन्त्र उम्मेदवार बनेका शुद्धोधन गाउँपालिका–४, मोतीभारी का २८ वर्षीय राजाबाबु भनिने दीपेन्द्रकुमार चौधरीको हत्यामा संलग्न २ जनालाई प्रहरीले पक्राउ गरेको छ । तर प्रहरीले उनीहरुको नाम सार्वजनिक गरेको छैन ।

स्थानीयहरुबीच पारिवारिक झगडाका क्रममा गोली चलेको र त्यसैक्रममा चौधरीको मृत्यु भएको प्रहरीको प्रारम्भिक अनुसन्धानबाट खुलेको एक प्रहरी अधिकारीले जनाए ।

अहिले घटनास्थल वरपर स्थिति अनियन्त्रित बनेको छ। गोली चलाएको आरोप लागेका स्थानीय अजित पाण्डेको पेट्रोल पम्पमा आगजनी गर्न जाँदै गरेको भीड नियन्त्रण गर्न प्रहरीले बल प्रयोग गरेको छ ।

प्रहरीले रबरका गोली चलाएको छ भने अश्रुग्याँस प्रहार गरेको छ । आफन्तहरुले तौलिहवा-लुम्बिनी सडक अवरुद्ध गरेका छन्।