बुटवल-प्रधानमन्त्री केपी शर्मा ओलीले आइतबार (आज) मन्त्रिपरिषद्को आकस्मिक बैठक बोलाएका छन् ।

प्रधानमन्त्रीको आह्वानमा बैठक अपराह्न १२ बजे बालुवाटारमा बस्ने स्रोतले बतायो । नियमित बैठक सोमबार बस्ने तय भइसकेको अवस्थामा ओलीले आकस्मिक बैठक बोलाएका हुन् । बैठकमा एसिड आक्रमण कसुरसम्बन्धी विधेयक मन्त्रिपरिषद्ले जारी गर्ने एजेन्डा रहेको र अन्य केही विधेयकका बारेमा छलफल हुने स्रोतको भनाइ छ ।

एसिड सम्बन्धी सरकारले ल्याएको विधेयक मन्त्रिपरिषद्ले जारी गरेपछि आजै राष्ट्रपति विद्यादेवी भण्डारीबाटबाट प्रमाणिकरण हुने बताइएको छ । सरकारले पहिलेको कानून संशोधन गरी एसिड आक्रमण कसुरको सजायमा वृद्धि गर्दै नयाँ अध्यादेश सिफारिस गरेको छ । एसिड आक्रमण गरेमा २० वर्ष सजाय र आक्रमणबाट मृत्यु भएमा जन्मकैदको सजायको सिफारिस गरिएको छ ।