काठमाण्डाै – सरकारले समस्याग्रस्त सहकारीका बचतकर्तालाई पैसा फिर्ता दिन शुरू गरेको छ । समस्याग्रस्त सहकारी व्यवस्थापन समितिले आज ३७८ जना पीडितलाई गरी १३ लाख ९९ हजार २१६ रुपैयाँ फिर्ता गरेर पैसा फिर्ताको काम शुरू गरेको हो ।

समस्याग्रस्त सहकारी व्यवस्थापन समितिका अनुसार आज कान्तिपुर सहकारीका २१५ जनाले ९ लाख ८९ हजार ७१६ रुपैयाँ, पशुपति सहकारीका ७ जनाले ४१ हजार ४६५ रुपैयाँ र शिवशिखर सहकारीका १५६ जनाले ३ लाख ६८ हजार ३५ रुपैयाँ गरी कुल १४ लाख रुपैयाँ फिर्ता पाएका छन् ।

यसअघि घोषणा गरिएअनुसार समितिले आजदेखि १० हजार रुपैयाँभन्दा कम बचत रहेका पीडितलाई पैसा फिर्ता दिने काम शुरू भएको हो । १० हजार रुपैयाँभन्दा कम बचत रहेका पीडितलाई क्रमैसँग रकम फिर्ता गर्दै लैजाने समितिले जनाएको छ ।

समितिका अनुसार समस्याग्रस्त सहकारीका झन्डै ७६ हजार बचतकर्ताको झन्डै ४६ अर्ब रुपैयाँ बचत फिर्ता गर्नुपर्ने छ । तीमध्ये धेरैजसो साना बचतकर्ता रहेका छन् । ५ लाखभन्दा कम रकम बचतकर्तालाई साना बचतकर्ता र ५ लाखभन्दा धेरै रकम बचतकर्तालाई ठूला बचतकर्ताका रूपमा वर्गीकरण गरिएको छ । कुल ७६ हजारमध्ये ५ लाख रुपैयाँभन्दा धेरै बचत गर्ने १८ हजार जना रहेका समितिले जनाएको छ ।