काठमाडौं । संसद्को बहुउदेश्यीय (मल्टिपर्पोज) हलबाटै आगामी आर्थिक वर्षको बजेट भाषण हुने भएको छ ।

प्रतिनिधिसभाका लागि निर्माणाधीन भवनको प्राविधिक काम नसकिँदा अहिले सदन चलिरहेको हलबाटै बजेट भाषण गर्न लागिएको हो ।

“नयाँ हलमा फर्निसिङ फिनिसिङको काम सकिएको देखिए पनि प्राविधिक पक्ष (अडियो, भिडियो, एमसीआर) व्यवस्थापनसहित अन्य कुरा पनि मिल्नुपर्‍यो । अहिले सम्भव देखिएन,” संसद् सचिवालयका प्रवक्ता एकराम गिरीले भने ।

सिंहदरबारस्थित प्रतिनिधिसभाका लागि बनिरहेको हलबाट बजेट भाषणको तयारी थियो । सोहीअनुसार काम पनि भइरहेको थियो ।

तर, शुक्रबार (भोलि) अपराह्न ४ बजे प्रस्तुत हुने बजेट भाषणका लागि त्यो हलबाट सम्भव नहुने निष्कर्षमा संसद् सचिवालय पुगेको हो ।

हल नबन्दा निर्माणाधीन भवनको मल्टिपर्पोज हलमा प्रतिनिधिसभा बस्दै आएको छ । सोही हलमा संघीय संसद्को दुवै सदनको संयुक्त बैठकमा अर्थमन्त्री स्वर्णिम वाग्लेले बजेट भाषणा गर्नेछन् ।