काठमाण्डौ – राष्ट्रिय स्वतन्त्र पार्टी रास्वपा को चितवनमा चलिरहेको पहिलो महाधिवेशनको बन्दसत्र अझै शुरू भएको छैन । बिहान साढे ८ बजे शुरू हुने भनिएको बन्दसत्र अझै शुरू हुन नसकेको हो ।

शुरूमा प्राविधिक समस्याका कारण केही ढिलाइ भइरहेको बताइए पनि रास्वपाका नेताहरूले अहिले महाधिवेशन प्रतिनिधिको तय भएको नामावली सच्याउनुपर्ने भएकाले केही ढिलाइ भइरहेको बताएका छन् ।

सञ्चारकर्मीसँग कुरा गर्दै प्रवक्ता मनिष झाले मधेश प्रदेशका प्रतिनिधिहरू केही छुटेकाले उनीहरूलाई समावेश गर्ने गरी गृहकार्य भइरहेको बताउनुभयो । उहाँका अनुसार महाधिवेशन प्रतिनिधिको सङ्ख्या केही बढिसकेको छ ।

आज बिहानसम्म झन्डै ४ हजार ३०० जना प्रतिनिधि पुगेका र अब मधेशका केही थपिने क्रममा रहेका प्रवक्ता झाले जानकारी दिनुभयो । उहाँले अब रास्वपाको महाधिवेशन एक दिन लम्बिन सक्ने पनि बताउनुभयो ।

विविध कारणले ढिला हुनसक्नेबारे यसअघि बसेको केन्द्रीय समिति बैठकमा पनि छलफल भएको भन्दै उहाँले एक दिन लम्बिनुलाई स्वाभाविक रूपमा लिएको बताउनुभयो ।