बुटवल । कपिलवस्तुको महाराजगञ्ज नगरपालिका-२ गैडहवास्थित हुलाकी सडकखण्डमा यात्रुवाहक बस दुर्घटना हुँदा चालकसहित २२ जना घाइते भएका छन्।

धनगढीबाट काठमाडौंतर्फ जाँदै गरेको सुदूरपश्चिम प्रदेश ०१-००१ ख ३७२१ नम्बरको शिवपुरी लक्जरी कोच प्रालिद्वारा सञ्चालित बस अनियन्त्रित भई सडकको डिभाइडरमा ठोक्किएपछि पल्टिएको प्रहरीले जनाएको छ।

दुर्घटनाका बेला बसमा चालकसहित ४६ जना सवार थिए। घाइतेमध्ये अधिकांशको टाउको, हात, खुट्टा, छाती, कम्मरलगायत शरीरका विभिन्न भागमा चोट लागेको प्रहरीले जनाएको छ।

घाइते सबैलाई तत्काल उद्धार गरी जिल्ला अस्पताल तौलिहवामा प्रारम्भिक उपचार गरिएको थियो। गम्भीर अवस्थाका घाइतेलाई थप उपचारका लागि भैरहवास्थित मेडिकल कलेजमा रिफर गरिएको छ

दुर्घटनापछि केही समय हुलाकी सडकखण्डमा सवारी आवागमन प्रभावित भएको थियो। पछि क्रेनको सहायताले दुर्घटनाग्रस्त बस हटाइएपछि दुवैतर्फको यातायात सेवा पुनः सञ्चालनमा आएको प्रहरीले जनाएको छ। प्रहरीले दुर्घटनाको कारणबारे थप अनुसन्धान गरिरहेको छ