बागमती प्रदेश ट्राफिक प्रहरी कार्यालयका अनुसार धादिङको गजुरीदेखि गल्छीसम्म विभिन्न स्थानमा ठूलो मात्रामा लेदो जमेको छ। लेदोले सडक ढाकेका कारण तत्काल सवारी सञ्चालन गर्न सक्ने अवस्था नरहेको प्रहरीले जनाएको छ।

अवरुद्ध सडक खुलाउन नेपाली सेना, नेपाल प्रहरी र सशस्त्र प्रहरी बल परिचालन भएका छन्। सुरक्षाकर्मी तथा सम्बन्धित निकायले उपकरण प्रयोग गरी सडकमा जमेको लेदो हटाउने काम गरिरहेका छन्।

यता, मुग्लिन–नारायणगढ सडकखण्ड भने सञ्चालनमा रहेको छ। तर सडकको समग्र अवस्था र यात्रुमा देखिएको सतर्कताका कारण उक्त सडकमा पनि सवारी आवागमन निकै कम रहेको प्रहरीले जनाएको छ।

बाढी र पहिरोपछि विभिन्न स्थानमा सडक जोखिमपूर्ण बनेकाले प्रहरीले अत्यावश्यक बाहेक यात्रा नगर्न आग्रह गरेको छ। विशेषगरी पृथ्वी राजमार्ग तथा मुग्लिन–नारायणगढ सडकखण्डमा यात्रा गर्नुअघि सडकको पछिल्लो अवस्थाबारे जानकारी लिन र सम्भव भएसम्म वैकल्पिक मार्ग प्रयोग गर्न सुझाव दिइएको छ।

सडकमा जमेको लेदो हटाउने र अवरुद्ध खण्ड सञ्चालनमा ल्याउने प्रयास जारी रहे पनि अवस्था सामान्य नभएसम्म पृथ्वी राजमार्गमा सवारी सञ्चालन गर्न कठिन हुने ट्राफिक प्रहरीले जनाएको छ।