बुटवल- प्रहरी इन्काउन्टरमा मारिएका गुन्डा नाइके मनोज पुनको अर्का सहयोगी पक्राउ परेका छन्। रुपन्देही बुटवल उपमहानगरपालिका-१७ का चौधरी डंगोरिया थारु पक्राउ परेकाे रुपन्देही प्रहरीले जनाएको छ।

पक्राउ परेका थारु बलु भनिने बसन्त पौडेलको हत्या योजनामा संग्लन रहेको रुपन्देही प्रहरी प्रमुख एसपी हृदय थापाले जानकारी दिए ।

पौडेलको हत्यामा संलग्न भइ फरार रहेका ओमप्रकाश चौधरी भन्ने बुटवल उपमहानगरपालिका १७ मनहरापुरका ५१ वर्षीय चौधरी डंगोरिया थारु पक्राउ परेको जिल्ला प्रहरी कार्यालयले जनाएको छ ।

उनी पौडेलको हत्यामा संलग्न भइ विभिन्न लुटपाटका घटनामा समेत संलग्न भएको प्रमाणका आधारमा उनलाई पक्राउ गरेको जिल्ला प्रहरी कार्यालय रुपन्देहीका प्रवक्ता प्रहरी नायब उपरीक्षक धर्मराज भण्डारीले जानकारी दिए ।

उनीविरुद्ध २०७४ फागुन ९ गते देवदह भवानीपुरमा वसन्त पौडेलको हत्यामा संलग्न भएको, २०६५ असार ९ गते शरदमान श्रेष्ठलाई अपहरण गरी बन्धक बनाएको, २०७५ चैत १२ गते तिलोत्तमा ३ का रमेश चौधरीलाई झुक्याएर १० लाख रुपैयाँ लुटेको जस्ता उजुरी छन् ।

भैरहवाबाट बिहीबार पक्राउ परेका चौधरीविरुद्ध प्रहरीले डाँका मुद्दा दर्ता गरी अदालतबाट म्याद थपेर अनुसन्धान थालेको जनाएको छ ।