(जनता टुडे) रुपन्देहीको गैडहवा गाउँपालिका विष्णुपुरास्थित सशस्त्र प्रहरी वेश क्याम्पका सशस्त्र प्रहरीका इन्स्पेक्टर तेजबहादुर जोरा र सशस्त्र प्रहरी सहायक हवल्दार वीरेन्द्रप्रसाद चौधरी घुस रकमसहित पक्राउ परेका छन् ।

अख्तियार दुरुपयोग अनुसन्धान आयोग बुटवलको टोलीले दुवैलाई गैडहवा–३ बाट ६ हजार रुपैयाँ घुससहित रङ्गेहात पक्राउ गरेको हो ।

घरायसी सामान ओसारपसारमा सहजीकरण गरिदिने भन्दै घुस लिएको अख्तियार दुरुपयोग अनुसन्धान आयोग बुटवलका सूचना अधिकारी सुरेश भुसालले जानकारी दिनुभयो । दुवैलाई नियन्त्रणमा लिएर बुटवलमा राखिएको छ ।

भ्रष्टाचार निवारण ऐन अनुसार दुवैलाई कारवाही गरिने भुसालले जानकारी दिनुभयो । आरोपीलाई शुक्रवार अख्तियार दुरुपयोग अनुसन्धान आयोग टंगाल काठमाडौं पठाइने छ ।