तिलोत्तमा।
तिलोत्तमा–४ मा क्रियाशील सामाजिक संस्था तिलोत्तमा सिर्जनशील समाजले स्थापना दिवसको अवसरमा सरसफाई कार्यक्रम गरेको छ । खुला शुन्य पोलोथिन अभियानलाई सघाउन वडा नं. ४ सँगको सहकार्यमा समाजले सरसफाई गरेको हो । ड्राइभरटोल चोकमा गरिएको कार्यक्रममा जनप्रतिनिधिहरुको पनि सहभागिता रहेको थियो ।
तिलोत्तमा नगर प्रमुख बासुदेव घिमिरेको प्रमुख आतिथ्यतामा भएको कार्यक्रममा वडाध्यक्ष दिवाकर ढकालले कार्यक्रमको औचित्यको बारेमा प्रष्टाउनु भएको थियो । सोही अवसरमा धार्मिक सहिष्णुता र भ्रमण वर्षको प्रचारका लागि देवघाटदेखि लुम्बिनीसम्मको साइकल यात्रा गरेका चितवनका एक दम्पतीलाई स्वागत समेत गरिएको थियो । भरतपुर महानगरपालिका १ पोखरा बसपार्ककी रुक्मिणी सापकोटा घिमिरे र केशव घिमिरेले ३ दिने साइकल यात्रा गरेका हुन् ।
धार्मिक पर्यटकीयस्थल देवघाटको मन्दिरमा पूजा गरी यात्रामा निस्किएको साइकल यात्री रुक्मिणीले बताउनुभयो् । उहाका अनुसार देवघाटबाट भरतपुर २ लिलाचोकमा रहेको मस्जितमा आएर त्यहाँबाट लुम्बिनी यात्रा तय गरिएको हो । नेपाल भ्रमण वर्ष २०२० र धार्मिक सहिष्णुता तथा पर्यावरणका लागि साइकल यात्रामा निस्किएको उनले बताउनुभयो् ।
पुस २५ गतेदेखि २६ गतेसम्म नारायणगढ, हेटौंडा र चितवनको पर्यटकीय क्षेत्र मेघौलीको यात्रा गर्ने पनि जनाइएको छ । १० वर्ष पहिलेदेखि साइकल यात्रा गर्दै आएका दम्पत्तिले यसअघि मुक्तिनाथ, वेनी, वन्दीपुर, काठमाडौं, सिन्धुली लगायतका स्थामा पुगिसकेका छन् भने चितवनको पर्यटकीय क्षेत्र सिराइचुली, उपरदाङगढी लगायतका स्थानमा पनि साइकल यात्रा गरिसकेका छन् ।
पर्यटन प्रवर्द्धनसँगै स्वास्थ्यका लागि र पर्यावरणका लागि पनि साइकल यात्रा महत्वपूर्ण रहने उनीहरूको भनाई छ । विभिन्न जिल्लाको यात्रा गरिसकेका दम्पत्तिले कुनै कार्यक्रममा निमन्त्रण आए आयोजकले खर्चको व्यवस्था गर्ने गरे पनि धेरै जसो खर्च भन् आफैँ गर्ने गरेको बताउनुभयो। प्रतिघण्टा १५ किलो मिटरसम्म यात्रा गर्ने गर्दछन् भने एक दिनमा १५० किलो मिटरसम्म साइकल यात्रा गरेको रुक्मिणीले बताउनुभयो् । सडकमा साइकल लेन नहुनु तथा साइकलको फाइदाबारे मानिसलाई जानकारी नहुँदा साइकल यात्रीको संख्या बढ्न नसकेको उहाको भनाई छ ।