कास्की

थ्रीस्टारलाई पराजित गर्दै नेपाल पुलिस आहा रारा गोल्डकप फुटबलको फाइनलमा प्रवेश गरेको छ ।

१८ औँ संस्करणको प्रतियोगिता अन्तर्गत पोखरा रंगशालामा बुधबार भएको पहिलो सेमिफाइनल खेलमा पुलिसले थ्रीस्टार क्लबलाई ३–० गोल अन्तरले पराजित गरेको हो ।

खेलको ८ औँ मिनेटमा पुलिसका भरत शाहले गोल गर्दै १–० को अग्रता दिलाएका थिए । पहिलो हाफ १–० गोलअन्तरमा सकिएको खेलमा दोश्रो हाफमा निरकुमार राईले २ गोल गरे ।

दोश्रो हाफको ५१ र ७२ औँ मिनेटमा राईले गोल गर्दै पुलिसलाई ३–० को जित दिलाएका हुन् । खेलको म्यान अफ दि म्याच पुलिसका निरकुमार राई भए ।

बिहीबार दोश्रो सेमिफाइनलमा मनाङ मर्स्याङ्दी क्लब र नेपाल आर्मी क्लबबीच पोखरा रंगशालामा दिउँसो साढे दुई बजे हुनेछ ।