बुटवल । रुपन्देहीको तिलोत्तमा नगरपालिकाले भारतबाट आयातित तरकारी तथा फलफूल प्रयोग नगर्न नगरवासीलाई आग्रह गरेको छ ।

कोभिड१९ को सम्भावित जोखिमलाई मध्यनजर गर्दै भारतबाट आयात हुने तरकारी तथा फलफूल प्रयोग नगर्न तिलोत्तमा नगरपालिकाले आग्रह गरेको हो ।
लकडाउनका अवधिमा पनि बुटवल र भैरहवाका थोक तरकारी बजारमा अधिकांश तरकारी र फलफूल भारतका विभिन्न प्रदेशबाट आयात हुने गरेको छ ।

भारतबाट आयात हुने तरकारी र फलफूलबाट कोरोना संक्रमण फैलिन नसक्ने विश्वस्त आधार नदेखिएकाले तिलोत्तमा नगरपालिका क्षेत्रमा भारतबाट आयातित तरकारी तथा फलफूलको खरिद, बिक्री(वितरण तथा उपभोग नगर्न सार्वजनिक सूचना जारी गरेर नगरवासीलाई अनुरोध गरिएको नगर प्रमुख बासुदेव घिमिरेले बताए ।

भारतबाट तरकारी र फलफूलका ट्रक भारतीय चालक र सहचालकले नै ल्याउने र यहाँका तरकारी थोक बजारका व्यवसायी र कामदार समेत कैयौं भारतीय नागरिक नै भएकाले कोरोनाको जोखिम हुने भन्दै नगरपालिकाले हालको विषम् परिस्थितिमा स्वदेशमैं उत्पादित तरकारी, फलफूललगायतका कृषिउपज प्रयोग गर्न नगरवासीलाई अनुरोध गरेको छ ।

स्वदेशमैं उत्पादित कृषिउपज भिडभाड नगरी व्यक्तिबीचको दुरी कायम गरी तोकिएको समयमा मात्र खरिद, बिक्री(वितरण गर्नु नगरपालिकाले सबैलाई सूचित गरेको सूचनामा उल्लेख छ ।

तिलोत्तमाले लकडाउनको अवधिको लागि अत्यावश्यक खाद्यान्न तथा तरकारी खरिद तथा बिक्रीको लागि बिहान ११ देखि २ बजेको समय तोकेको छ ।

यस्तै दूधको खरिद तथा बिक्रीको लागि बिहान ६ देखि ८ तथा साँझ ३ देखि ५ बजेको समय निर्धारण गरेको छ ।

नगरवासीले स्थानीय स्तरमा आफूसक्दो कृषिउपज उत्पादन कार्यमा जुट्न हुन समेत सम्पूर्ण नगरवासीमा अनुरोध गरेको छ ।

कतिपय स्थानीय तहका किसानले मुलुक अप्ठेरो अवस्थामा रहेका बेला दूध पोखेर गलत काम गरेको भन्दै नगरभित्रका पशुपालक किसानलाई उत्पादित दूध त्यसरी नपोख्न र खपतमा समस्या भए नगरपालिकामा जानकारी गराउन आग्रह गरेको छ ।