काठमाण्डौ
पश्चिम रुकुमको चौरजहारी नगरपालिका–८ सोतीमा जातीय विभेदलाई लिएर ज्यानै जानेगरी भएको घटनाको छानबिनगरी दोषीलाई कारबाही गर्न पत्रकार महासंघले माग गरेको छ ।

महासंघका महासचिव रमेश विष्टले निकालेको विज्ञप्तिमा घटनाको निष्पक्ष छानबिन गरी दोषीलाई कानुनी दायरामा ल्याउन र यस्ता आपराधिक घटना दोहोरिन नदिन सरकारको गम्भीर ध्यानार्कषण गराइएको उल्लेख छ ।

देशमा संघीय लोकतान्त्रिक गणतान्त्रिक व्यवस्था स्थापित भइ जातीय विभेद र छुवाछूत अन्त्य गर्ने घोषणा भइसकेको अवस्थामा यस्ता घटना मानव अधिकारविरुद्धको निकृष्ट ज्यादति र मानवताविरुद्धको जघन्य अपराध भएको भन्दै मानव सभ्यतालाई नै कलंकित बनाउने र कानुनी शासनको धज्जी उडाउनुका साथै समाज कुन दिशातर्फ जाँदै छ भन्ने प्रश्नसमेत खडा गरेको महासंघले जनाएको छ ।
यस्तै, पत्रकार महासंघले घटनाका विषयमा भ्रामक समाचार सामग्री र सामाजिक सञ्जालमा पोष्ट नगर्न पनि आग्रह गरेको छ ।