बुटवल -आफ्नै छोरालाई ज्यूंदै लगेर खाडलमा गाडेको भन्दै बुटवलका राजु परियारलाई प्रहरीले पक्राउ गरेको छ ।

बुटवल उपमहानगरपालिका वडा नं. ११ प्रगतीनगरका परियारले ६ वर्षका छोरा राजेश परियारलाई डिंगरनगर स्थीत सामुदायिक वनको तिनाउ नदि किनारको जग्गामा लगेर गाडेका थिए ।

ईलाका प्रहरी कार्यालयले बालकलाई ज्यूंदै गाडेको भन्नु सूचना पाएपछि खाडल खनेर निकालेको थियो ।

ईलाका प्रहरी कार्यालय बुटवलका प्रहरी निरिक्षक नविन चुंदालीले बालकलाई खाडलबाट निकालेर लुम्बिनी प्रादेशिक अस्पताल बुटवलमा ल्यांदा अस्पतालले मृत घोषणा गरेको जानकारी दिए ।

परियारले बिरामी भई अचेत भएको छोरालाई अटोरिक्सामा राखी लगेर गाडेको स्थानीयले बताएका छन् । प्रहरीले परियारलाई नियन्त्रणमा लिएर अनुसन्धान शुरु गरेको जनाएको छ ।

परियारले छोराको घरमै मृत्यु भएपछि तिनाउ किनारमा लगेर गाडेको प्रहरी सामु बयान दिएका छन् ।