नेपालमा कोरोना भाइरस (कोभिड–१९) संक्रमितको संख्या १० हजार नाघेको छ ।

स्वास्थ्य तथा जनसंख्या मन्त्रालयले मंगबार दिएको जानकारीअनुसार पछिल्लो २४ घण्टायता थप ५ सय ३८ जनामा कोरोना पोजिटिभ देखिएको हो ।

मन्त्रालयका प्रवक्ता प्रा. डा जागेश्वर गौतमका अनुसार देशभरिका विभिन्न स्थानका प्रयोगशालामा गरिएको परीक्षणमा कोरोना संक्रमण पुष्टि भएको जानकारी दिएका हुन् ।

उनका अनुसार आज संक्रमण पुष्टि हुनेमा ९० महिला र ४४८ पुरुष रहेका छन् ।

यससँगै नेपालमा कोरोनाबाट संक्रमण हुनेको संख्या १० हजार ९९ पुगेको छ । जसमा २ हजार २३५ जनाले काेराेना जितेका छन् ।

मंगलबार मात्र थप ७६ जना काेराेनामुक्त भएका हुन् ।

यसैगरी गत २४ घण्टायता थप एक जनाकाे मृत्यु भएसँगै काेराेनाबाट ज्यान गुमाउनेकाे संख्या २४ पुगेकाे छ ।