आज (आइतबार) मुलुकका विभिन्न स्थानमा हल्कादेखि मध्यम वर्षा हुने अनुमान मौसम पूर्वानुमान महाशाखाले गरेको छ ।

केही दिनदेखि जारी भारी वर्षा भने आज नहुने महाशाखाको भनाइ छ । दिउँसो मौसम सामान्य बद्ली हुने र प्राय सफा रहने जनाइएको छ । महाशाखाले भारतको बिहारमा न्यून चापीय क्षेत्र कमजोर हुने भएकाले मौसममा क्रमिक सुधार हुने अपेक्षा गरेको छ ।

बिहानैदेखि प्रदेश १ मा मौसम पूर्ण रुपमा बद्ली रहे पनि त्यसले खासै प्रभाव नपार्ने जनाइएको छ । बाँकी प्रदेशमा सामान्य बद्ली रहेको महाशाखाले जनाएको छ । दिउँसो प्रदेश १, २, बागमती प्रदेश र गण्डकी प्रदेशमा सामान्य बदली रही थोरै स्थानहरू तथा प्रदेश ५, कर्णाली प्रदेश र सुदूरपश्चिम प्रदेशमा आंशिक बदली रही एक दुई स्थानमा मेघगर्जन र चट्याङ्गसहित हल्कादेखि मध्यम वर्षाको सम्भावना रहेको महाशाखाले जनाएको छ ।

राति प्रदेश १, बागमती प्रदेश, गण्डकी प्रदेशमा सामान्य बदली रही थोरै स्थानहरू तथा बाँकी प्रदेशहरुमा आंशिक बदली रही एक, दुई स्थानहरुमा हल्का वर्षाको सम्भावना रहेको छ ।