बुटवल
बुटवल उपमाहानगर पालिकाले श्वासप्रश्वासमा समस्या भएका कोरानो संक्रमितका लागि घरघरमै अक्सिजन सिलिण्डर पुर्‍याउने गरी तयारी थालेको छ । ।
महामारीविरुद्ध शुरूदेखि नै व्यवस्थित र अभिभावकीय भूमिका निर्वाह गर्दै आएको बुटवल उपमहानगरपालिकाले होम आइसोलेसनमा बसेकाका लागि आपतकालीन अवस्थामा घरसम्मै अक्सिजन उपलब्ध गराउने तयारीमा जुटेको छ ।
अहिले होम आइसोलेसनमा रहेकाहरूको परीक्षण, नियमित स्वास्थ्य निगरानी, योग र आयुर्वेद ओखती वितरण, एम्बुलेन्स तयारी अवस्थामा छन् ।
नगरका दीर्घ रोगीको विवरण संकलन गरेर घरमै अत्यावश्यक ओखती पुर्‍याएको उपमहानगरले अहिले तिनै दीर्घरोगी र संक्रमितको अवस्थालाई मध्यनजर गर्दै अक्सिजन सहितको स्वास्थ्य सेवा पुर्‍याउने तयारी गरिरहेको छ ।
होम आइसोलेसनमा बसेकालाई तत्कालै अक्सिजन मात्रै भए पनि राहत हुने र उपचार प्रभावकारी हुने अवस्था भएका ठाउँमा आवश्यक प्रक्रिया पूरा गरेर अक्सिजन उपलब्ध गराउने र स्वास्थ्यकर्मीलाई समेत घरमै पठाउने तयारी शुरू गरिएको तथा प्राविधिकसँग छलफल भइरहेको प्रमुख शिवराज सुवेदीले बताउनुभयो । यसका लागि उपमहानगरको स्वास्थ्य तथा जनसंख्या महाशाखामार्फत, स्वास्थ्यकर्मी, प्राविधिकलाई अक्सिजन उत्पादकसमक्ष छलफल गर्न प्रमुख सुवेदीले निर्देशन दिइसक्नुभएको छ।
अक्सिजन उत्पादक कम्पनी र कोरोना उपचारका लागि स्थापना भएका अस्पतालसँग प्राविधिक अध्ययनसँगै प्रक्रिया अगाडि बढाइएको प्रमुख सुवेदीले बताउनुभयो ।
बुटवल उपमहानगरका सहरी स्वास्थ्य प्रर्बद्धन केन्द्र तथा स्वास्थ्य चौकीको सेवाप्रवाहलाई अझ व्यवस्थित गराउँदै जस्ता स्वास्थ्य संस्थामार्फत वडा तहको सहकार्यमा संक्रमितको नियमित स्वास्थ्य निगरानी शुरू गरिएको छ । यसका लागि उपमहानगरले वडा तहमै तत्काल रेस्पोन्स टीम बनाउने तयारी गरेको छ ।
प्रमुख सुवेदीले जनस्वास्थ्यको क्षेत्रमा उपमहानगर जिम्मेवार रहँदै आएको बताउँदै उपलब्ध रहेका साधन स्रोतको अभावमा कसैको पनि अकालमा ज्यान नजाओस् भनेर थप संवेदनशील बनेको बताउनुभयो ।
उपमहानगरका कर्मचारीको कोरोना संक्रमणबाट निधन भएको र उनले समयमा आईसीयू सहितको बेड नपाएको घटनापछि उपमहानगरमा जनप्रतिनिधिले थप तदारुकता देखाएका छन् ।