काठमाण्डौ – प्रधानमन्त्री सुशीला कार्कीले आत्मविश्वासका साथ अघि बढ्न उद्योगी तथा व्यवसायीहरूलाई आह्वान गर्नुभएको छ । नेपाल उद्योग वाणिज्य महासंघले काठमाण्डौमा आयोजना गरेको राष्ट्रिय आर्थिक बहस २.० मा बोल्दै प्रधानमन्त्री कार्कीले यस्तो आह्वान गर्नुभएको हो । अहिले आशंका र भय पाल्ने बेला नभइ हातेमालो गर्ने बेला रहेको प्रधानमन्त्री कार्कीको भनाइ छ ।

सरकार आउँदो फागुन २१ गते तोकिएको प्रतिनिधि सभाको चुनावको तयारीमा जुटेको जानकारी गराउँदै उहाँले चुनावमार्फत दिगो लोकतान्त्रिक प्रक्रियामा देश अगाडि बढाउने बताउनुभयो । उहाँले घुसखोरी, पार्टीगत लेवी र कमिसनको सञ्जाल अब सह्य नहुने चेतावनी पनि दिनुभयो । इमान्दार उद्यमीलाई प्रताडित गर्ने र नीतिगत चलखेल गर्नेहरु पोसिने अवस्था नरहने उहाँको भनाइ छ ।

जेनजी आन्दोलनको घटनापछि मर्माहत भएको निजी क्षेत्रलाई जेनजी आन्दोलनमा घाइते युवाहरूलाई झैँ तत्काल राहत, सहयोग पुर्‍याउँदै आत्मविश्वासको जगेर्ना गर्न सरकारले कुनै कसर बाँकी नराख्ने प्रतिवद्धता व्यक्त गर्नुभयो । प्रधानमन्त्री सुशीला कार्कीले कानूनको शासन स्थापित गर्न सरकारले कुनै कसर बाँकी नराख्ने प्रतिवद्धता जनाउनुभएको छ ।