चितवन । नारायणगढ-मुग्लिन सडकखण्डमा पुनः पहिरो खस्दा सडक दुईतर्फी रूपमा अवरुद्ध भएको छ । सडक डिभिजन कार्यालय भरतपुरका अनुसार सोमबार दिउँसो २:१० बजेदेखि मुग्लिन बजार नजिकै पहिरो खसेपछि सडक पूर्ण रूपमा अवरुद्ध बनेको हो ।

पहिरो पन्छाउन एउटा डोजर/हेभी उपकरण परिचालन भइसकेको छ भने थप दुईवटा उपकरण घटनास्थलतर्फ पठाइएको सडक डिभिजन कार्यालयले जनाएको छ । कार्यालयका अनुसार पहिरो हटाएर सडक सञ्चालनमा ल्याउन करिब ४५ मिनेट लाग्ने अनुमान गरिएको छ ।

यसअघि सोमबार बिहान पनि यही सडकखण्डका विभिन्न स्थानमा पहिरो खसेपछि केही समय सडक एकतर्फी सञ्चालन गरिएको थियो । त्यसपछि पहिरो पन्छाएर दुवैतर्फी यातायात सञ्चालनमा ल्याइए पनि दिउँसो पुनः पहिरो खसेपछि सडक फेरि अवरुद्ध भएको हो ।

सडक डिभिजन कार्यालयले अत्यावश्यक बाहेकको यात्रा नगर्न तथा यात्रा गर्नै परे सडकको पछिल्लो अवस्थाबारे जानकारी लिएर मात्र यात्रा गर्न चालक तथा यात्रुलाई आग्रह गरेको छ ।