सिंहदरबारस्थित संसदीय दलको कार्यालयमा बिहान ११ बजे बस्ने बैठकमा पार्टी सभापति रवि लामिछानेले संसदीय अनुशासन र मर्यादाका विषयमा स्पष्ट निर्देशन दिने कार्यक्रम रहेको छ ।

बैठकमा सरकार र पार्टीका सांसदबीच पछिल्लो समय बढ्दै गएको अविश्वास, संसद्मा प्रस्तुत हुने शैली तथा सांसदका सार्वजनिक गतिविधिबारे समीक्षा गरिने एक नेताले जानकारी दिए ।

विशेषगरी संसद्मा सांसदहरूले प्रयोग गर्ने भाषा र व्यवहार संसदीय मर्यादाअनुकूल नभएको गुनासो बढेपछि अनुशासन उल्लङ्घन गर्ने सांसदलाई सचेत गराउने तयारी पार्टीले गरेको छ ।

यसअघि मंगलबार बसेको प्रतिनिधिसभा बैठकमा परराष्ट्रमन्त्री शिशिर खनालले दिएको जवाफप्रति असन्तुष्टि जनाउँदै रास्वपा सांसद आशिका तामाङले पुनः प्रश्न गर्न खोजेकी थिइन् । तर सभामुख डीपी अर्यालले संसदीय मर्यादा र गरिमाको ख्याल गर्न भन्दै समय नदिएपछि सांसद तामाङ आक्रोशित हुँदै बैठक कक्षबाट बाहिरिएकी थिइन् ।

आफ्नै दलका मन्त्री र सभामुखसँग सांसदहरूको खिचातानी बढ्दै गएपछि रास्वपाले आन्तरिक अनुशासन कायम गर्न मन्त्री र सांसदबीच छलफल गर्न लागेको हो ।