काठमाण्डौ , रसुवाको भोटेकोशी नदीमा आएको विनासकारी बाढीपछि अप्पर त्रिशूली हाइड्रोपावरको सुरुङभित्र फसेका ३५० मजदुर तथा स्थानीयलाई नेपाली सेनाले उद्धार गरेको छ ।

प्रतिकूल मौसम र बाढीको तीव्र बहावका बीच अत्यन्तै जोखिमपूर्ण र चुनौतीपूर्ण परिस्थितिको सामना गर्दै नेपाली सेनाले उनीहरूलाई उद्धार गरेको हो । त्यही सुरुङमा फसेका १०० जनाभन्दा धेरैलाई सुरक्षित बाहिर निकाल्ने प्रयास भैरहेको नेपाली सेनाले जनाएको छ ।

यसैगरी, बाढीको उच्च जोखिममा परेका रसुवाका अन्य विकट भूगोलमा पुगेर सेनाले उद्धारलाई निरन्तरता दिएको छ । हिजो अबेरसम्म रसुवाका विभिन्न प्रभावित ठाउँबाट ८८३ जना स्थानीय तथा मजदुरको उद्धार गरिएको सेनाले जनाएको छ ।