नवलपुर ।
पूर्वी नवलपरासीको कावासोतीमा गण्डकी प्रदेशको आन्तरिक मामिला तथा कानुन मन्त्रालयको आयोजनामा प्रहरी ऐन निर्माणका लागि छलफल भएको छ ।
आन्तरिक मामिला तथा कानुन मन्त्री हरिबहादुर चुमान, पूर्व एआईजी बमबहादुर भण्डारी, पूर्व प्रहरी महानिरीक्षक उपेन्द्र शाही लगायतका विशेषज्ञहरुको सहभागितामा छलफल कार्यक्रम भएको हो ।
कार्यक्रममा सहभागीहरुले प्रहरी जनताप्रति जवाफदेही हुन नसकेको भन्दै टिप्पणी गरेका थिए ।
कार्यक्रममा स्थानीय राजनीतिक दलका प्रतिनिधिहरु, विभिन्न संघसस्थाका प्रतिनिधि एवम् सरोकारवालाहरुको सहभागिता रहेको थियो ।
कार्यक्रममा प्रदेश सांसद रोशनबहादुर गाहा, जिल्ला समन्वय समिति नवलपुरका प्रमुख चेसराम आले, नेकपाका केन्द्रिय सदस्य किसान गैरे, नेपाली काँग्रेस नवलपुरका सचिव बालकृष्ण घिमिरे लगायतले सुझाव दिएका थिए ।
छलफल कार्यक्रम जनमुखी तथा लोकतान्त्रिक प्रहरी निर्माणका लागि कसरी गर्ने प्रदेश प्रहरीको संगठन र संरचना कसरी निर्माण गर्ने व्यवसायिक र आधुनिक प्रहरी कसरी निर्माण गर्ने,अपराध रोकथाम र अनुसन्धानमा प्रदेश प्रहरीको कस्तो भुमिका हुने लगायतका विषयमा छलफल गरिएको थियो ।
गण्डकी प्रदेश सरकार प्रदेशका लागी प्रहरी सम्बन्धि ऐन ल्याउन लागेकोले आन्तरिक मामिला तथा कानुन मन्त्रालयले प्रदेश भित्रका सम्पूर्ण जिल्लामा पुगी सरोकारवालाहरुसंग छलफल बढाएको छ ।